بقترح يتعمل حاجة زي disclaimer أو تحذير مثلًا, في بداية الأفلام و القصائد و الأغاني, زي ما بيتعمل عادة في الأفلام عن إن فيه مشاهد عنف أو إباحية, او ان الأحداث ملهاش علاقة بالحقيقة.
بس التحذير دا يكون عن إن محتوي قصة الفيلم أو الإغنية ممكن يفكرك ب تروما ما مريت بيها, صديق فقدته من أهلك أو حياتك, أو موقف سخيف مريت بيه و بتتمنى تنساه, و معرفتش تتجاوز الأمر.
عشان ميتين أم اللحظة اللي لما بتشوف أو تسمع حاجة و تلاقي نفسك بتقول " إيه دا, إزاي يذيعوا حاجة زي دي " .
التحذير هيكون بسيط علي هيئة : " هذة الأغنية تحكي عن شخص يحب أفراد عائلته, لو فقدت أحد أفراد أسرتك و لسه - لسبب ما - عندك مشاكل, لا تسمع هذة الأغنية لو سمحت, و لو سمعتها مش هيبقى ليك الحق تقاضينا بعد كده"
و التواريخ برده .. كل التواريخ اللي بقى عندك مشاكل معاها, تاريخ ميلاد البنت اللي بتحبها و تاريخ جوازها من شخص ما مثلًا.
أزاي يعني تتجاوز دا ؟, ازاي البشر يطلبوا منك دا اصلًا حتي ؟
المفروض يخبوا التواريخ من أنظمة التشغيل علي الكمبيوترات, و يحرقوا النتايج, و يفضل لو نبطل نستخدم التقويمات عامة و نعيش اليوم بيومه لغاية لما ربنا يرحمنا.
يعني الحل مش إنك ببساطة تتجاوز المواقف دي كلها و تبقي انسان سوي؟
مش إنك تتعامل معاهم كأنهم كدمات من خناقة مقصدتش تدخلها مع الكون, هتتعافى بعدها و تستعد للمرة اللي جاية ؟
علي الإطلاق ..
الحل إنك تقفل أبواب أكتر, تصنع بلاك ليست أطول, تستخبي تحت أكبر قدر من الطرابيزات.
No comments:
Post a Comment